|

Mandement des généraux des Monnaies aux gardes, maître particulier et contregarde de la Monnaie de Paris, exécutoire des lettres patentes du 21 juillet 1519 qui ordonnent la fabrication d'écus d'or au soleil, de douzains et de dizains

1519, 6 août

Arch. nat., Z1b 61 f° 67v°. Copie

Arch. nat., Z1b 62 f° 175v°. Copie

De par les généraulx conseilliers du roy, notre sire, sur le fait de ses monnoyes. Gardes, maistre particulier et contregarde de la Monnoye de Paris. En acomplissant le contenu ès lettres patentes du roy, notred. seigneur, données à Sainct-Germain-en-Laye le XXIe jour de juillet derrenier passé, au vidimus desquelles ces présentes sont atachées soubz l'un de noz signetz, nous vous mandons que faictes forger en lad. Monnoye escuz selon les patrons et formes que vous envoyons et grans blancs de douze deniers et dix deniers tournois pièce, des poix et loy dont mention est faicte esd. lettres, qui auront cours pour les pris contenuz en icelles, et faictes tailler lesd. escuz de leur droit poix qui est deux deniers seize grains troys quars chacune pièce, au remedde de demy-grain sur le fort et sur le foible chacune pièce, en manière que à la délivrance ilz se treuvent du poix de deux deniers seize grains trébuchans pour le moins, et seront les grans blancs douzains, le blanchissage fait et prestz à délivrer de deux deniers deux grains chacune pièce, à ung grain de remedde sur le fort et sur le foible, en manière qu'il y en ayt autant de fors que de foibles et que à la délivrance ilz ne soient point plus foibles que de demy-denier pour marc, et les grans blancs de dix deniers tournois pièce reviennent, le blanchissage fait et prestz à délivrer, du poix de ung denier vingt-troys grains, aux remeddes sur marc et sur pièces ainsi que lesd. grans blancs de douze deniers tournois, en donnant par vous, maistre particulier, à ceulx qui livreront or en lad. Monnoye sept-vingtz-sept livres tournoys pour chacun marc d'or fin et XII livres X sols tournois pour marc d'argent à douze deniers de loy argent-le-roy et non plus, et vous donnez garde que à la taille desd. ouvraiges ne soit fait faulte, et si aucunes se trouvent faictes refaire l'ouvraige, et de rechef tailler et ouvrer aux despens des ouvriers, sur peine d'en porter la peine pour eulx. Et vous tailleur, taillez doresnavant les fers desd. escuz et grans blancs selon lesd. patrons, avec l'ancienne différance de lad. Monnoye, en continuant le compas, rotondité et largeur d'iceulx avec la lettre et escripture sans la faire plus longue, gresle ou abregée. Et à ce que en soyons plus acertenez noz envoyez dedans ung moys après la réception de ces présentes les patrons desd. escuz et grans blancs que aurez ainsi faitz et taillez pour estre veuz et gardez en la Chambre desd. monnoyes. Et s'il advient que led. tailleur mue ou change, vous, gardes, nous envoyez les patrons du tailleur nouvellement ordonnez, et vous tous chacun selon le deu de voz offices en tant que à ung chacun de vous touche faictes nouveaulx pappiers vrais et meilleurs que n'avez fait par cy-devant en gardant en ce et toutes autres choses le contenu ès ordonnances faictes sur le fait de voz offices et charges, le tout sur les peines contenues et déclarées en icelles et d'autre si griefve pugnition que ce doive donner exemple à ung chacun, et cesser tout autre ouvraige et gardez les vielz fers jusques à ce que autrement en soit ordonné, et cloez les boestes et les nous envoyez par homme seur venant par-deçà, en baillant à ce porteur certifficacion de la réception de ces présentes. Donné à Paris, en la Chambre desd. monnoyes, soubz nosd. signetz, le sixiesme jour d'aoust l'an mil cinq cens et dix-neuf.

Mention d'envoi : Paris (6 août 1519), Rouen, Lyon, Montpellier (9 août 1519), Tours, La Rochelle, Angers, Poitiers, Limoges, Bordeaux, Villefranche-de-Rouergue (11 août 1519), Bourges, Saint-Pourçain (12 août 1515).