|

Lettres missives qui ordonnent la fabrication de testons et demi-testons par l'atelier monétaire d'Angers

1523, 25 mai

Arch. nat., Z1b 61 f° 110v°. Copie

Arch. nat., Z1b 62 f° 209r°. Copie

De par le roy. Noz amez et féaulx. Nous avons entendu qu'il y a gros nombre de billon qui vient chacun jour en notre ville d'Angers et que par faulte que les gardes et maistre de la Monnoye dud. lieu n'ont permission de forger testons et demys-testons en lad. Monnoye en ensuivant l'ordonnance que avons derrenièrement faicte, nous estans à Troyes, il se transporte grosse quantité dud. billon hors notre royaume, par quoy avons advisé qu'il sera bon bailler permission ausd. gardes et maistre de la Monnoye d'Angers de forger testons et demys-testons des poix et loy dont fut dépesché lad. ordonnance. A ceste cause nous vous mandons et enjoignons très expressement que vous permectez ausd. garde et maistre de lad. Monnoye d'Angers de forger desd. testons et demys-testons en ensuyvant lad. ordonnance, de laquelle vous luy baillerez ou envoyrez ung double en baillant ou faisant bailler par ceulx de lad. ville d'Angers caucion suffisante se fait ne l'avoyent jusques à quelque somme que adviserez, qu'il ne se fera aud. aud. (sic) forgement et ouvraige qui se fabriquera en lad. Monnoye aucune faulte ou abbuz, et aussi que aux fontes et essaiz qui se feront en icelle Monnoye on appellera aucuns bons personnaiges de lad. ville en ce entenduz pour avoir l'[o]ueil à ce que led. maistre forge loyamment et jouxte icelle ordonnance, et n'y faictes faulte, car tel est notre plaisir. Donné à Bloys le vingt-cinquiesme jour de may l'an mil cinq cens vingt-troys. Ainsi signé, Françoys et Gedoyn.