Autorisation accordée par les généraux des Monnaies à Jean Barbedor et Guillaume Sotin, gardes de la Monnaie de Paris, exécutoire d'un arrêt du Conseil privé du 9 juin 1540, pour faire fabriquer en la Monnaie de Paris la quantité de 1.000 à 1.100 marcs d'oeuvre de testons

1540, 16 juin

Arch. nat., Z1b 9 f° 160r°. Mention

Sur ce que samedi dernier, douzième jour de ce présent moys de juing, maistre Jehan Barbedor et Guillaume Sotin, gardes de la Monnoye de ceste ville de Paris, ont présenté au bureau de la Chambre de céans la requeste par eulx naguères présentée au roy et à nos seigneurs de son Conseil et la response et ordonnance sur icelle, de laquelle ordonnance dud. Conseil la teneur ensuit. Le Conseil du roy a ordonné que lesd. suppliants feront monnoyer et mectre en testons la quantité de mil à unze cens marcs d'argent qui de présent sont ouvrez et en flaons ainsi qu'il est contenu en la requête cy-dessus escripte, et lesquelz, au préceddans la dernière ordonnance faicte sur le faict desd. monnoyes, ilz auroient receuz des officyers comptables de ce royaume suyvant ce que lors il leur avoit esté permis et ordonné. Fait au Conseil privé tenu à Fontainebleau le IXe jour de juin l'an mil Vc quarente. Ainsi signé, Preudomme. Après lecture de laquelle requête et ordonnance dud. Conseil, estant en la fin de lad. requête, a esté ordonné au bueau de lad. Chambre qu'il sera monnoyé en icelle Monnoye de Paris la quantité de mil à unze cens marcs en testons mentionnez en lad. requête, ès présences de maîtres Claude Manperlier et Cosme Luylier, conseillers et généraulx en lad. Chambre, à ce commis ou l'un d'eulx en l'absence l'un de l'autre.