Autorisation accordée par les généraux des Monnaies à Jean Guibail, maître particulier de la Monnaie de Bourges, pour faire fabriquer en la Monnaie de Bourges la quantité de 600 marcs d'oeuvre de liards, 300 marcs d'oeuvre de doubles deniers tournois et 300 marcs d'oeuvre de petits deniers tournois

1542, 15 mai

Arch. nat., Z1b 10 f° 122r°. Mention

Sur la requeste présentée à la Chambre de céans par Jehan Guibail, maistre particullier de la Monnoye de Bourges, requérant par icelle luy estre par nous permis faire ouvrer et monnoyer en lad. Monnoye la quantité de deux mil mars de lyars, doubles et petis deniers tournois ou telle autre quantité qu'il nous plairoit ordonner parce que au pays de Berry y a bien peu de petite monnoye. Considéré le contenu de laquelle requeste il est permis aud. suppliant faire ouvrer et monnoyer en lad. Monnoye de Bourges la quantité de six cens mars de deniers lyars, trois cens mars de deniers doubles et troys cens marcs de deniers petis tournois, le tout des poix, loy et aux remeddes cy-après déclairez, c'est assavoir lesd. deniers lyars à deux deniers six grains de loy argent-le-roy, qui est de loy deux deniers trois grains trois quars de grain fin, à deux grains de loy dud. argent-le-roy de remedde, et de dix-neuf solz trois deniers de taille au marc de Paris, qui sont deux cens trente-une pièce aud. marc et dix-neuf grains trébuschans chacune pièce, au remedde d'un grain sur le fort et sur le foible chacune pièce, tellement que à la délivrance ilz ne soient plus foibles de deux pièces sur chacun marc, et lesd. deniers doubles à ung denier six grains de loy argent-le-roy, qui est de loy ung denier quatre grains troys quars fin, à deux grains de remedde dud. argent-le-roy, et de XVI sols IIII deniers de taille aud. marc, qui sont IXxxXVI pièces pour marc et XXIII grains et demy chacune pièce, au remedde d'un grain sur le fort et sur le foible chacune desd. pièces, en sorte qu'ilz ne soient plus foibles de troys pièces pour marc à la délivrance, et lesd. petis deniers tournois à dix-huict grains de loy argent-le-roy, qui sont XVII grains ung quart fin de loy, à deux grains dud. argent-le-roy de remedde, et de vingt-et-ung solz de taille aud. marc, qui sont deux cens cinquante-deux pièces aud. marc, et dix-huict grains de poix chacune pièce, au remedde d'un grain sur le fort et sur le foible, à ce que à la délivrance ilz ne soient plus foibles de trois pièces pour marc. A la charge qu'il ne se fera aucune délivrance en lad. Monnoye que les prévostz des ouvriers et monnoyers d'icelle n'y soient présens et appellez, lesquelz seront tenuz signer lesd. délivrances et oultre sera tenu led. maître faire bon et loyal registre de tout ce qui sera délivré en lad. Monnoye, le tout suyvant les ordonnances. Et faisons inhibitions et deffenses ausd. maistre et gardes de lad. Monnoye de Bourges de ne ouvrer et monnoyer ne souffrir estre ouvré et monnoyé en icelle Monnoye plus grande quantité desd. liars, doubles et petis deniers tournois que dessus est dict et déclaré.