Autorisation accordée par les généraux des Monnaies à Jacques le Tartier, anciennement commis à la maîtrise particulière de la Monnaie de Troyes, pour faire monnayer en la Monnaie de Troyes la quantité de 100 marcs d'oeuvre de billon

1542, 28 août

Arch. nat., Z1b 10 f° 167r°. Mention

Sur la requeste présentée à la Chambre de céans par Jacques le Tartier, naguères commis à la maistrise particullière de la Monnoye de Troyes, contenant que depuys la closture de ses boistes dernièrement faicte en lad. Monnoye il auroit commencé une ou deux bresves en icelle Monnoye et y a encores de présent environ cent marcs de billon non fondu appartenant aux changeurs et marchans qui le luy ont livré en icelle Monnoye, lequel billon led. suppliant ne sçauroit payer ausd. marchans sans premièrement estre ouvré, requérant a ceste cause led. suppliant luy estre par nous permis de parachever, d'ouvrer et monnoyer led. billon en lad. Monnoye dedans ung moys ou tel autre temps qu'il nous plairoit ordonner, pendant lequel temps seroit pourveu d'un maître particullier en lad. Monnoye ayant sur ce lettres de bail du roy pour obtenir lad. maistrise. Considéré le contenu de laquelle requeste et ce qui faict à considérer, il est permis aud. le Tartier, suppliant, de faire ouvrer en lad. Monnoye de Troyes lesd. cent marcs de billon dedans quinze jours prochainement venant et led. temps eschat et passé fera clorre la boiste d'icelle Monnoye et icelle envoira en la Chambre de céans pour en faire le jugement en la manière acoustumée, et oultre luy sont faictes deffenses de par lad. Chambre de ne faire ouvrer ne monnoyer aucune matière, tant d'or que billon, lesd. quinze jours passez sans avoir lettres et permission du roy.