|
Mandement des généraux des Monnaies aux gardes, tailleur, essayeur, contregarde et maître particulier de la Monnaie de Rennes, relatif à la fabrication des espèces monétaires en la Monnaie de Rennes
1542, 15 septembre
Arch. nat., Z1b 10 f° 177r°. Copie
De
par les généraulx conseillers du roy, notre sire, sur le faict
de ses monnoyes. Gardes, tailleur, essayeur, contregarde et maître particulier
de la Monnoye de Rennes. Il a esté ordonné en la Chambre de
céans que doresnavant seront faictz et forgez ès Monnoyes de
ce royaulme, pays et seigneuryes de l'obéissance du roy escus soleil
à XXIII karats, à ung VIIIe de karat de remedde, de LXXI écus
et ung VIe d'escu de poix au marc de Paris, et de deux deniers XVI grains
troys quars chacune pièce, au remedde d'un quart de grain sur le fort
et sur le foible, en sorte qu'ilz ne soient à la délivrance
plus foibles en troys mars de quatre félins et demy, et desd. escuz
ne ferez faire aulcune délivrance qu'il n'y ayt troys mars pour le
moings, mectant par vous en boiste de deux cens desd. escuz monnoyez et délivrez
ung denier escu pour après en faire les jugemens. Quant aux deniers
grans blans douzains faictes les ouvrer à III deniers XVI grains de
loy argent-le-roy, qui est de loy III deniers XII grains ung tiers de grain
fin, à deux grains dud. argent-le-roy de remedde, les faisant tailler
du poix et recours de deux deniers troys grains chacune pièce, à
ce que après le blanchissaige faict ilz reviennent de poix de deux
deniers deux grains chacune pièce, en sorte qu'ilz soient de sept solz
sept deniers ung quart de denier aud. marc, qui sont IIIIxxXI pièces
et ung quart de pièce, à ung grain de remedde chacune pièce
sur le fort et sur le foible, tellement qu'il y en ayt autant de fors que
de foibles, à ce que à la délivrance ilz ne soient plus
foibles que de demye-pièce pour marc, et lesquelz deniers douzains
délivrez en neuf marcs à troys poix, chacun poix de III marcs,
en faisant mectre en boiste de LX sols desd. deniers douzains monnoyez et
délivrez, qui font XXXVI livres d'iceux, un denier douzain. Et faictes
bailler par vous, gardes, par le maître particullier de ladicte Monnoye
de Rennes aux changeurs et marchans qui luy livreront or, argent et billon
en lad. Monnoye du marc d'or fin VIIIxxV livres VII sols VI deniers, et du
marc d'argent à XII deniers de loy argent-le-roy, qui est XI deniers
XII grains fin XIIII livres tournois. Quant aux deniers lyards, à II
deniers VI grains de loy argent-le-roy, qui est de loy II deniers III grains
III quars de grain fin, à II grains de loy dud. argent-le-roy de remedde,
et de XIX sols III deniers de taille aud. marc de Paris, qui sont IIcXXXI
pièce aud. marc, et XIX grains tresbuchans chacune pièce, au
remedde d'un grain sur le fort et sur le foible chacune pièce, tellement
que à la délivrance ilz ne soient plus foibles de deux pièces
sur chacun marc. Et lesd. deniers doubles tournois à ung denier six
grains de loy argent-le-roy, qui est de loy ung denier quatre grains III quars
fin, à II grains de remedde dud. argent-le-roy et de XVI sols IIII
deniers de taille aud. marc, qui sont IXxxXVI pièces pour marc, et
XXIII grains et demy chacune pièce, au remède d'un grain sur
le fort et sur le foible chacune desd. pièces, tellement qu'ilz ne
soient plus foibles de troys pièces pour marc à la délivrance.
Et lesd. petiz deniers tournois à XVIII grains de loy argent-le-roy,
qui sont XVII grains ung quart fin, à II grains dud. argent-le-roy
de remedde, et de vingt-ung solz de taille aud. marc, qui sont IIcLII pièces
aud. marc, et XVIII grains de poix chacune pièce, au remedde d'un grain
sur le fort et sur le foible, tellement que à la délivrance
ilz ne soient plus foibles de III pièces pour marc. Et lesquelz deniers
liards, doubles et petitz deniers tournois délivrez pareillement en
neuf marcs à III poix, chacun desd. poix de III marcs, en mectant en
boiste de LX sols desd. deniers lyards monnoyez et délivrez, vallans
IX livres d'iceulx, ung denier liard, et de LX sols desd. deniers doubles
tournois, vallans VI livres d'iceulx, ung denier double tournois en boiste,
et de LX sols desd. petitz deniers tournois, vallans LX sols, ung petit denier
tournois. Et ne faillez vous, gardes, à faire tenir l'ordre que dessus
est dict, et besongnez aux remeddes dessus déclairez, et que en faisant
les délivrances, tant d'or que de blanc, vous faciez mectre en marge
le débet qui restera ou ce qui sera deu à la boiste pour le
reprandre à l'autre délivrance d'après. Et en faisant
les délivrances de l'or faictes peser de troys marcs à troys
poix, à ce qu'ilz ne soient poinct plus foibles de quatre félins
en troys marcs, à XXIII karats, à I/VIIIe de karat de remedde,
et le poix faict, faictes faire essay par l'essayeur ainsi qu'il est cy-après
déclairé...
[...]
Escript à Paris en la Chambre des monnoyes le quinziesme jour de septembre
l'an mil cinq cens quarente-deux.