|
Lettres patentes autorisant François Guilhem, maître particulier de la Monnaie de Lyon, de fabriquer jusqu'à la quantité de 24.000 marcs d'oeuvre de testons et demi-testons
1543, 25 juillet
Arch. nat., Z1b 537. Original
Arch. nat., Z1b 63 f° 58bisv°. Copie
François,
par la grâce de Dieu, roy de France. A noz amez et féaulx conseillers
les généraulx sur le faict de noz monnoyes, salut. Notre cher
et bien amé François Guilhem, maistre particullier de notre
Monnoye de Lyon, nous a faict dire et remonstrer que depuis l'ordonnance par
nous faicte en notre ville d'Abbeville par laquelle aurions faict cesser en
noz Monnoyes l'ouvraige et fabrication des gros et demyz-gros testons et que
depuis autre ordonnance par nous faicte en notre ville de Blois par laquelle
aurions donné pris au marc d'argent pour quatorze livres tournois,
sur lequel aurions ordonner faire et forger en nosd. Monnoies douzains, liards
et autres menues monnoyes pour peupler notre royaume de monnoye, lequel lors
en estoit desnué, les marchans et banquiers allemans hantans et fréquentans
les foires de notre ville de Lion ont délaissé et discontinué
d'apporter cendrées et argent blanc aud. Lyon et autres villes de notre
royaume pource que par lad. ordonnance aurions donné pareil pris au
marc d'argent blanc que au marc d'argent allyé de cuyvre appellé
billon pour forger lesd. douzains et liards, ce que toutesfois n'auroit esté
acoustumé de faire, tant par nous que par noz prédecesseurs,
et aussi que led. marc d'argent blanc vault ès païs d'Allemaigne
et autres païs estrangés le pris de quatorze livres dix solz tournois
et par ce moyen lesd. cendrées et argent blanc dont il estoit apporté
par chacun an par lesd. Allemans en notred. royaume pour plus de deux cens
mil escuz et par eulx employé partie en marchandise et le reste en
change, faisoit tousjours tenir esd. foires de Lyon l'argent large et à
bas pris, ce que lesd. marchans allemans ne font de présent ains ont
pris le train d'Envers, auquel lieu, pource que led. marc d'argent est à
plus hault pris que en notred. royaume, ilz y portent lesd. cendrées
pour lesquelles ilz preignent lettres de change à rendre aud. Lion,
tellement que au lieu desd. cendrées et argent blanc qu'ilz apportoient
et demeuroit en notred. royaume pour le grant traffic et commerce desd. Allemans
n'y a à présent que lettres de change qui cause l'enrichissement
desd. païs estrangés et cherté de deniers comptans esd.
foires de Lyon, auquel lieu les changes de tous les païs, mesmes estrangers,
respondent. Nous réquérant, actendu ce que dict est et que notred.
royaume est à présent suffisamment remply d'autre monnoye blanche,
luy voulsissions permectre faire ouvrer et monnoier en notred. Monnoye de
Lyon gros et demyz-gros testons de tel poix, loy et cours qu'il seroit par
nous advisé sur led. pris de XIIII livres X sols tournois marc d'argent
blanc, et que, en ce faisant, lesd. Allemans et autres marchans apporteroient
en notred. royaume lesd. cendrées et argent blanc, dont il seroit par
luy faict dedans ung an jusques à vingt-quatre mil marcs ou plus desd.
gros et demyz-gros testons, led. ouvraige ou la pluspart provenans desd. cendrées
ou argent blanc qui seroit apporté en notred. royaume par lesd. Allemans
et autres, en quoy oultre le soullaigement qui en viendra à noz subgectz
et enrichissement de notred. royaume aurions grans proffict ; laquelle requeste
aurions renvoyée par-devant notre amé et féal conseiller
et maître des requestes ordinaire de notre hostel maître André
Guillard et vous pour nous en donner advis. Ce que après avoir eu l'advis
et oppinion d'aucuns notables personnaiges experimentez au faict desd. monnoies,
auroit esté et par icelluy auroit esté advisé que pour
le présent pourrions permectre aud. Guilhem faire ouvrer et monnoyer
en notred. Monnoie de Lion gros et demyz-gros testons sur led. pris de XIIII
livres X sols tournois le marc d'argent, des poix, loy et aux remeddes qui
ont par cy-devant esté faictz et forgez les autres gros testons en
nosd. Monnoies, en donnant cours et mise ausd. gros testons pour unze sols
tournois la pièce et aux demyz à l'esquipollant, et lesquelz
et autres jà forgez à noz coing et armes et courans se prandront
et alloueront entre nosd. subgectz pour led. pris po[r]veu qu'ilz soient de
poix de sept deniers dix grains trébuschans pièce et les demyz
de trois deniers dix-sept grains trébuschans, à la charge que
led. Guilhem seroit tenu faire ouvrer et monnoier dedans led. an lad. quantité
de XXIIIIm marcs desd. gros et demyz-gros testons, du (sic) nous paier tel
droit de seigneuriaige qui nous seroit deu par faulte de non avoir faict par
led. Guilhem ouvré et monnoyé lad. quantité de XXIIIIm
marcs, à quoy faire led. Guilhem se seroit submis pourvueu qu'il feust
seul qui eust congé et permission de nous de faire ouvrer et monnoier
en notred. royaume gros et demys-gros testons led. temps et espasse d'ung
an durant. Laquelle requeste veue par nous en notre Conseil privé,
ensemble lesd. advis et submission, voulans donner à nosd. subgectz
moien d'eulx enrichir et que lesd. cendrées soient doresnavant apportées
tant par lesd. marchans et banquiers allemans que autres en notred. royaume
et que la fabrication desd. gros et demyz-gros testons est utille pour le
soullaigement de nous et de nosd. subgectz et aussi que eu esgard à
la bonté intrincesque des douzains que faisons maintenant baptre et
forger en nosd. Monnoies et du gros teston qui sera faict sur led. pris de
XIIII livres X sols tournois marc d'argent estant des poix et loy dont on
a par cy-devant faict et forgé lesd. gros et demys-gros en nosd. Monnoies
sur led. pris de XIIII livres X sols tournois marc d'argent, au brassaige
que adviserez avec led. Guilhem, et lesquelz gros testons qui seront par luy
faictz et autres jà faictz auront cours et mise pour unze solz tournois
et les demyz à l'esquipollant, pourveu qu'ilz soient de poix de sept
deniers dix grains trébuschans, aussi que led. Guilhem se submecte
et oblige par-devant vous de faire ouvrer et monnoier dedans ung an à
commancer du jour de la première délivrance qu'il fera desd.
gros testons lad. quantité de XXIIIIm marcs, du (sic) nous paier tel
droict de seigneuriage qu'il nous seroit deu pour non avoir faict ouvrer lad.
quantité de XXIIIIm marcs, et auquel Guilhem seul avons permis et permectons
par cesd. présentes pendant led. temps d'ung an faire ouvrer, baptre
et monnoier gros et demys-gros testons aux charges contenues en sond. office
et submission cy-dessus déclairez, le tout par manière de provision
seullement et sans ce que par le moien de la fabrication desd. gros et demyz-gros
testons sur led. pris de XIIII livres X sols tournois marc d'argent par nous
octroyé aud. Guilhem led. marc d'argent puisse estre vendu ne achapté
par les maîtres particulliers de noz Monnoies, changeurs, orfèvres,
affineurs et depparteurs et quelzconques autres personnes à plus hault
pris que XIIII livres tournois, à la charge que led. Guilhem, oultre
la différance de lad. Monnoye de Lyon fera mectre telle différance
qu'il sera par vous advisé affin que aud. ouvraige ne se puisse commectre
aucune faulte ou abbus. De ce faire vous donnons pouvoir, nonobstant lad.
ordonnance par nous faicte à Abbeville pour faire cesser l'ouvraige
desd. testons, mandemans ou deffenses à ce contraires, car tel est
notre plaisir. Donné à Paris le XXVe jour de juillet l'an de
grâce mil cinq cens quarante-trois et de notre règne le vingt-neufiesme.
Par le roi, en son Conseil estably à Paris, Robertet.
[scellé sur simple queue de cire jaune]
Voir au
4 août 1543 : Submission et obligation du maître de la Monnoye
de Lyon pour l'ouvraige des gros et demy-gros testons (Arch. nat., Z1b
63 f° 63v° et 75r°).
Voir au 28 avril 1544 : Modération faicte sur la permission du roy
au maistre de la Monnoye de Lyon de faire gros et demyz-gros testons (Arch.
nat., Z1b 63 f° 136r°, entérinnement le 5 mai 1544, Arch. nat.,
Z1b 63 f° 137v°).
Voir au
1er et au 17septembre 1544 : Lettres des généraux des Monnaies
aux gardes de la Monnaie de Lyon pour la continuation de la fabrication des
testons et demi-testons en l'atelier monétaire de Lyon (Arch. nat.,
Z1b 10 f° 340 r° et 341v°).
Voir au 31 octobre 1544 : Permission au sieur François Guilgen,
maître particulier de la Monoye de Lyon de fabriquer douze mille marcs
de gros et demy-gros testons à unze sols tournois le teston pendant
une année à compter du jour de la première délivrance
(Arch. nat., Z1b 537 et Z1b 63 f° 189v°, entérinnement le 10
novembre 1544, Arch. nat., Z1b 63 f° 191r°).
Voir au 4 août 1545 : Supplique de François Guilhen, maître particulier
de la Monnaie de Lyon, au roi et à son Conseil privé, pour obtenir la permission
de fabriquer en la Monnaie de Lyon des testons et des demi-testons (s.d.).
Renvoi aux généraux des Monnaies pour avis (25 juillet 1545). Autorisation
des généraux des Monnaies pour 2.000 marcs d'oeuvre de testons et demi-testons
(4 août 1545). Monnaie
de Paris : ms F°232, f° 41r°-42v°
Voir au 29 août 1545 : Nouvelle permission accordée à
François Guilhen, maître particulier de la Monoye de Lyon de
fabriquer des gros et demy-gros testons jusqu'à concurrence de deux
mille marcs, à unze sols tournois le teston (Arch. nat., Z1b 537
et Z1b 63 f° 203v°, entérinnement le 2 décembre 1545,
Arch. nat. Z1b 63 f° 205v°).
Voir au
11 janvier 1547 : Permission à François Guilhen, maître
de la Monnoye de Lyon, de faire ouvrage de gros et demiz-gros testons jusques
au dernier jour de febvrier prochainement venant (Arch. nat., Z1b 12 f°
91v°).
Voir au 25 février 1547 : Permission au sieur François Guilhen,
maître particulier de la Monoye de Lyon, de continuer à fabriquer
des gros et demy-gros testons par-devant l'espace d'une année à
commencer du jour de ma première délivrance, jusques à
concurrence de deux mille marcs (Arch. nat., Z1b 537 et Z1b 63 f°
233v°, entérinnement le 18 mars 1547, Arch. nat., Z1b 63 f°
234v°).
Voir au 1er octobre 1548 : Lettres patentes autorisant François Guihen, maître
particulier de la Monnaie de Lyon, à fabriquer la quantité de 1.000 marcs
de testons et demi-testons (Arch. nat., Z1b 63 f° 299r°, entérinnement
le 26 octobre 1548, Arch. nat., Z1b 63 f° 300r°).