|



Mandement des généraux des Monnaies aux gardes de la Monnaie de Rouen, exécutoire des lettres patentes du 14 décembre 1543, autorisant Guillaume de Houppeville, maître particulier de la Monnaie de Rouen, de fabriquer jusqu'à la quantité de 6.000 marcs d'oeuvre de testons et demi-testons

1543, 17 décembre

Arch. nat., Z1b 63 f° 99v°. Copie

Les généraulx conseillers du roy, notre syre, sur le faict de ses monnoyes. A Guillaume le Forestier et Guillaume Lehoy, gardes de la Monnoye de Rouen. Veues par nous les lettres patentes du roy, notred. seigneur, données à Fontainebleau le XIIIIe jour de ce présent moys de décembre obtenues et à nous présentées de la partye de Guillaume de Houppeville, maistre de lad. Monnoye, dont la coppie deuement collationnée et signée par le greffier de la Chambre desd. monnoyes est cy-atachée soubz l'un de noz signetz, par lesquelles et pour les causes y contenues ledict seigneur a, par l'advis et délibération de son Conseil privé et de sa plaine puissance et auctorité royal, permys et octroyé aud. de Houppeville qu'il puisse et luy loyse achapter ou faire achapter des marchans, mariniers et compaignons de l'estat de mer et autres les lingotz d'argent qui seront portez en lad. Monnoye de Rouen pour le pris et somme et à la charge de faire valloir chacun marc d'argent quatorze livres dix solz tournois et en faire ouvrer, forger et monnoyer des testons et demy-testons des poix et aloy et ainsy qu'il est contenu ès ordonnances, au pris et valleur chacun teston de unze solz tournois et le demy à l'équipolent, jusques à la quantité de six mil marcz d'argent dedans ung an prochainement venant à compter de la dacte desd. lettres patentes, en payant aud. seigneur toutesvoyes par led. Houppeville le droict de seigneuriage avec les foyblages et escharcetez de loy qui se trouveront par le jugement dud. ouvraige, et là où il n'aura entièrement ouvré et monnoyé lad. quantité de six mil marcz dedans led. temps, payera néantmoins aud. seigneur led. droict de seigneuriage de ce qui restera à ouvrer comme plus à plain le contiennent lesd. lettres patentes. Nous, après avoir ouy sur ce le procureur du roy et veu son consentement vous mandons, de par led. seigneur et nous par ces présentes, que des lingotz et matières d'argent qui proviendront des prinses qui se feront sur la mer seullement et qui seront livrées en lad. Monnoye de Rouen, du jour et dacte desd. lettres patentes dud. seigneur jusques à ung an après ensuyvant vous faictes ouvrer et baptre en lad. Monnoye six mil marcz seullement de gros et demy-gros testons aux coings et armes dud. seigneur, à unze deniers six grains de loy argent-le-roy, à ung grain de remedde dud. argent-le-roy, et de deux solz ung denier et demy de taille au marc de Paris, qui sont XXV pièces et demye de taille au marc, au remedde d'un grain sur chacune pièce sur le fort et sur le foible, en sorte que les plus foybles soyent de sept deniers dix grains tresbuchans et les demys à troys deniers dix-sept grains, au brassaige de V sols VI deniers pour marc dud. ouvraige, qui est le semblable accordé au maistre de la Monnoye de Lyon, en mectant en boeste de trente-huict solz troys deniers desd. deniers gros testons ung denier d'iceulx et faisant bailler par led. de Houppeville aux ouvriers de lad. Monnoye de Rouen quinze deniers tournois pour marc d'euvre sans aucun deschet et aux monnoyers sept deniers tournois, et lesquelz gros et demy-gros testons délivrez en neuf marcz à troys poix, chacun poix de troys marcz, au remedde sur lesd. neuf marcz d'une pièce et non plus, sans à ce que la quantité dud. ouvraige vienne à diminution du faictfort dont a esté et est par nous chargé led. de Houppeville par le bail de sa maistrise, en faisant mectre par le tailleur de lad. Monnoye de Rouen, oultre le point ancien et lettre de la ville dud. lieu et différence dud. maistre, ung point dedans le D de DEI, et en faisant par vous gardes telle dilligence que lad. Monnoye soyt garnye d'ouvriers et monnoyers pour la fabrication dud. ouvraige en sorte qu'il n'y ayt défault, sur peyne de respondre par vous de l'intérest qui par faulte de ce en pourroyt venir aud. seigneur. Donné à Paris en la Chambre desd. monnoyes, soubz noz sceaulx, le XVIIe jour de décembre l'an mil Vc quarante-troys. Ainsy signé, Le Père.