|



Mandement des généraux des Monnaies à Nery Duboys, général des Monnaies en Bourgogne, autorisant Jacques Bergeron, maître particulier de la Monnaie de Dijon, de fabriquer en la Monnaie de Dijon la quantité de 600 marcs d'oeuvre de liards, 300 marcs d'oeuvre de doubles deniers tournois et 300 marcs d'oeuvre de petits deniers tournois

1544, 4 janvier

Arch. nat., Z1b 10 f° 280r°. Copie

Les généraulx conseillers du roy, notre sire, sur le faict de ses monnoyes. A maître Nery Duboys, général des Monnoyes dud. seigneur ou pays et duché de Bourgonne. Veue la requeste ce jourd'huy présentée en la Chambre desd. monnoyes de la partie de Jacques Bergeron, maistre de la Monnoye de Dijon, contenant entre autres choses la grande quantité de billon affluant en lad. ville de Dijon et ès envyrons à moyen du descry ce naguères faict par le roy des pièces de Mectz faictes en Lorraine, lequel billon est livré par chacun jour aud. suppliant en lad. Monnoye pour convertir en ouvraige de deniers lyardz, doubles et petitz deniers tournois parce que à présent y a bien peu desd. menues monnoyes, tant aud. Dijon que par tout le pays de Bourgongne, requérant pour ces causes et pour obvier à la grande indigence, perte et dommaige que a le pauvre peuple dud. pays par faulte de menue monnoye et aussi pour éviter le chomaige de lad. Monnoye de Dijon, luy estre par nous permis de faire ouvrer et monnoyer en icelle douze cens marcz desd. deniers lyardz, doubles et petitz tournois affin de subvenir d'icelle menue monnoye aud. pauvre peuple. Si vous mandons et commectons de par le roy, notred. seigneur, et nous, par ces présentes, que vous ayez à permectre aud. Jacques Bergeron, suppliant, et aux gardes de lad. Monnoye de Dijon, de faire ouvrer et monnoyer en lad. Monnoye la quantité de douze cens marcz de petite et menue monnoye, assavoir six cens marcz desd. deniers lyardz, troys cens marcz desd. deniers doubles et troys cens marcz desd. petitz deniers tournois en la forme qui s'ensuit, c'est assavoir lesd. deniers lyardz à deux deniers six grains de loy argent-le-roy, qui est de loy deux deniers troys grains troys quartz de grain fin, à deux grains de loy dud. argent-le-roy de remedde, et de dix-neuf [sols] troys deniers de taille au marc de Paris, qui sont deux cens trente-une pièces aud. marc et dix-neuf grains tresbuchans chacune pièce, au remedde d'un grain sur le fort et sur le foible chacune pièce, tellement que à la délivrance ilz ne soient plus foibles de deux pièces sur chacun marc, et lesd. deniers doubles tournois à ung denier six grains de loy argent-le-roy, qui est de loy ung denier quatre grains troys quartz fin, à deux grains de remedde dud. argent-le-roy, et de seize solz quatre deniers de taille aud. marc, qui sont IXxxXVI pièces pour marc et vingt-troys grains et demy chacune pièce, au remedde d'un grain sur le fort et sur le foible chacune desd. pièces, tellement qu'ilz ne soient plus foibles de troys pièces pour marc à la délivrance, et lesd. petitz deniers tournois à dix-huict grains de loy argent-le-roy, qui sont XVII grains ung quart fin de loy, à deux grains dud. argent-le-roy de remedde, et de XXI solz de taille aud. marc, qui sont deux cens cinquente-deux pièces aud. marc, et de dix-huict grains de poix chacune pièce, au remedde d'un grain sur le fort et sur le foible, tellement que à la délivrance ilz ne soient plus foibles de troys pièces pour marc. Et lesquelz deniers lyardz, doubles et petitz deniers tournois seront pareillement délivrez en neuf marcz à troys poix, chacun desd. poix de troys marcz, en mectant en boeste de soixante solz desd. deniers lyardz monnoyez et délivrez, vallant neuf livres d'iceulx, ung denier lyard, et de soixante solz desd. deniers doubles tournois, vallans VI livres d'iceulx, ung denier double tournois en boeste, et de soixante solz desd. petiz deniers tournois, vallans soixante solz d'iceulx, ung petit denier tournois, à la charge que lesd. deniers liardz, doubles et petitz tournoys seront faictz dedans six moys à compter du jour de la première délivrance desd. deniers et en votre présence ad ce que plus grande quantité ne soyt faicte desd. lyardz, doubles et petitz deniers tournois que lad. quantité cy-dessus. Et ce faire vous donnons povoir par cesd. présentes et mandons de par led. seigneur et nous à tous [ceux] qu'il appartiendra que à vous en ce faisant soit obéy. Donné à Paris en la Chambre desd. monnoyes, soubz noz seeaulx, le quatrième jour de janvier l'an mil cinq cens quarante-troys.