Mandement des généraux des Monnaies aux gardes de la Monnaie de Tours, autorisant Christophe Laulne, maître particulier de la Monnaie de Tours, de fabriquer en la Monnaie de Tours la quantité de 100 marcs d'oeuvre de petits deniers tournois

1544, 5 février

Arch. nat., Z1b 10 f° 284v°. Copie

Les généraulx conseillers du roy, notre [sire], sur le faict de ses monnoyes, aux gardes de la Monnoye de Tours. Veue la requeste ce jourd'huy présentée en la Chambre desd. monnoyes par Chrispofle [sic] Laulne, maistre de lad. Monnoye de Tous, nous vous mandons et commectons de par le roy, notred. sire, et nous, par ces présentes, que par led. maistre d'icelle Monnoye de Tours vous faictes et souffrez ouvrer et monnoyer en icelle Monnoye la quantité de cent marcz de petitz deniers tournois, à dix-huict grains de loy argent-le-roy, qui sont dix-sept grains ung quart fin, à deux grains dud. argent-le-roy de remedde, et de vingt-ung solz de taille au marc, qui sont deux cens cinquente-deux pièces aud. marc, et dix-huict grains de poix chacune pièce, au remedde d'un grain sur le fort et sur le foible, tellement que à la délivrance ilz ne soient plus foybles de troys pièces pour marc. Lesquelz petitz deniers tournois ferez délivrer en neuf marcz à troys poix, chacun desd. poix de troys marcz, en mectant en boeste de soixante solz desd. petitz deniers tournois, vallant soixante solz d'iceulx, ung petit denier tournois, et ce sans diminution de l'ouvraige que led. maistre est tenu faire ouvrer et monnoyer par chacun an en lad. Monnoye. A la charge aussi qu'il commencera à faire ouvrer lesd. petitz deniers tournois le premier jour d'avril prochain venant, lesquelz seront et achevez dedans le XVe jour dud. moys ensuyvant, et en votre présence, ad ce qu'il n'en soit faict plus grande quantité que le contenu cy-desus. Donné à Paris, en la Chambre desd. monnoyes, soubz noz sceaulx, le cinquiesme jour de février l'an mil cinq cens quarente-troys.