Mandement des généraux des Monnaies aux gardes de la Monnaie de Bordeaux, exécutoire des lettres patentes du 17 mai 1544, autorisant Robert Richard, maître particulier de la Monnaie de Bordeaux, de fabriquer jusqu'à la quantité de 700 marcs d'oeuvre de testons et demi-testons

1544, 9 juin

Arch. nat., Z1b 63 f° 185r°. Copie

Les généraulx conseillers du roy, notre sire, sur le faict de ses monnoyes. Aux gardes de la Monnoye de Bourdeaulx. Veues par nous les lettres patentes du roy, notred. seigneur, données à Saint-Germain-en-Laye le dix-septiesme jour de may dernier passé, obtenues et à nous présentées de la partie de Robert Richard, maître de lad. Monnoye de Bordeaulx, dont la coppie deuement collationnée à l'original, signée du greffier de la Chambre desd. monnoyes est cy-atachée soubz l'un de noz signetz, par lesquelles et pour les causes y contenues led. seigneur nous mande que s'il nous appert la fabrication des gros et demys-gros testons n'estre dommaigeable aud. seigneur ne à ses subjectz ains utille, nécessaire et prouffitable, en ce cas nous eussions à souffrir et permectre aud. suppliant, et auquel, ou cas dessusd. icellui seigneur, de sa grâce espéciale, plaine puissance et auctorité royal a permys et octroyé qu'il puisse et luy loyse achapter et faire achepter des marchans et maîtres des mynes, mariniers et compaignons de mer et aultres les thuilles, lingotz, cendrées, grenailles et argent blanc qui seront portez pour convertir esd. gros et demys-gros testons en lad. Monnoye de Bordeaulx à raison et au feur qu'il est tauxé et estimé par les ordonnances dud. seigneur, et d'icellui argent blanc en faire ouvrer et monnoyer en icelle Monnoye de Bordeaulx lesd. gros et demys-gros testons des poix et loy et aux remeddes et brassaige que faict à présent le maître de la Monnoye de Lyon, lesd. gros testons du pris de unze solz tournois et les demys à l'esquipolent et ce jusques à la quantité de sept cens marcz d'argent dedans ung an prouchain venant à compter du jour de la première délivrance qu'il fera dud. ouvraige en lad. Monnoye, en payant toutesfoys par led. Robert Richard aud. seigneur les droictz de seigneuriaige, foiblaige de poix et escharceté de loy qui seront par nous trouvez au jugement de l'ouvraige de ses boestes, et là où dedans led. an il n'auroyt entièrement ouvré et monnoyé lad. quantité de sept cens marcz d'argent, néantmoings paiera aud. seigneur le seigneuriaige de ce qu'il resteroye à ouvrer comme plus à plain le contiennent lesd. lettres. Oy sur lesquelles le procureur du roy en la Chambre desd. monnoyes et veu son consentement, nous vous mandons de par led. seigneur et nous, par ces présentes, que des thuilles, lingotz, cendrées, grenailles, argent blanc qui seront portez pour cest effect en lad. Monnoye de Bordeaulx par les marchans, maîtres des mynes, mariniers et compaignons de mer et aultres, après avoir prins par vous dud. Richard le serment dud. Richard, bonnes et suffisantes cautions, de faire lesd. sept cens marcz de gros et demy-gros testons dedans ung an prouchainement venant à compter du jour et dacte de ces présentes ou de paier au roy, notred. seigneur, le droict de seigneuriaige de ce qu'il restera à ouvrer desd. sept cens marcz d'iceulx gros et demys-gros testons, le brasage rabatu, desquelles cautions nous envoyerez les lettres originalles dedans six sepmaines prouchaines venantes pour icelles enregistrer au greffe de lad. Chambre, vous faictes ouvrer, batre et monnoyer en lad. Monnoye de Bordeaulx sept cens marcz seullement de gros et demys-gros testons aux coing et armes dud. seigneur, à XI deniers VI grains de loy argent-le-roy, à ung grain de remedde dud. argent-le-roy, et de deux solz ung denier et demy de taille au marc de Paris, qui sont XXV pièces et demye de taille au marc, au remedde d'un grain sur chacune pièce sur le fort et sur le foible, en sorte que les plus foibles soyent de sept deniers dix grains trébuchans et les demyz de troys deniersdix-sept grains tresbuchans, tellement que à la délivrance ilz ne soyent plus foibles en neuf marcz que d'une pièce desd. gros testons, au brassaige de V sols VI deniers pour marc dud. ouvraige, qui est le semblable accordé aux maîtres des monnoyes de Lyon, Rouen et Tours, en mectant en boeste de XXXVIII sols III deniers desd. deniers gros et demys-gros testons, qui sont dix-huict marcz, ung denier de iceulx, et faisant bailler par led. Richard aux ouvriers de lad. Monnoye de Bordeaulx quinze deniers tournois pour marc d'oeuvre sans aulcun deschet et aux monnoyers VII deniers tournois, et lesquelz gros et demys-gros testons vous ferez délivrer en neuf marcz à troys poix, chacun poix de troys marcz, au remedde sur lesd. neuf marcz d'une pièce et non plus, sans que lad. quantité d'ouvraige vienne à dyminution du faictfort dont a esté et est par nous chargé led. Richard par la vériffication du bail de sa maistrise, en faisant mectre par le tailleur de lad. Monnoye de Bordeaulx, oultre le point ancien et lettre de la ville dud. lieu de Bordeaulx et différance dud. Richard, maître de lad. Monnoye, ung point dedans le C de FRANCOR, en faisant au seurplus par vous gardes telle dilligence que lad. Monnoye soyt garnye d'ouvriers et monnoyers pour la fabrication dud. ouvraige en sorte qu'il n'y ayt faulte, sur peine de respondre par vous de l'intérest qui par faulte de ce en pourroyt venir aud. seigneur et aud. Richard. Donné à Paris en la Chambre desd. monnoyes, soubz noz seaulx, le neufiesme jour de juing mil VcXLIIII.