|
Lettres patentes autorisant Nicolas Maillard, maître particulier de la Monnaie de Rennes, de fabriquer jusqu'à la quantité de 1.000 marcs d'oeuvre de testons et demi-testons
1546, 5 juillet
Arch. nat., Z1b 537. Original
Arch. nat., Z1b 63 f° 222v°. Copie
François,
par la grâce de Dieu, roy de France. A noz amez et féaulx les
généraulx conseillers sur le faict de noz monnoies à
Paris, salut et dillection. Notre cher et bien amé Nicollas Maillard,
maître particullier
de notre Monnoie de Rennes, nous a faict dire et remonstrer que plusieurs
noz subjectz de notre païs de Bretaigne ont bien bonne quantité
de lingotz et vesselle d'argent procédans tant des prinses faictes
par mer sur noz ennmys que de ailleurs, lesquelz lingotz et vesselle d'argent
ilz vouldroient voluntiers faire applicquer et convertir en ouvraige de gros
et demyz-gros testons, ce qu'ilz ne peuvent bonnement faire pour ce que par
noz ordonnances ilz ne peuvent led. argent porter ailleurs et en autre Monnoie
que en notred. Monnoie de Rennes, et aussi qu'il n'est à présent
permys aud. exposant faire baptre d'iceulx testons et demys-testons. A ceste
cause, nous auroit requis luy octroier et permectre achepter et faire achepter
desd. lingotz et vesselle d'argent et d'iceulx faire forger, baptre et monnoier
en notred. Monnoie jusques à la quantité de mil mars d'argent
desd. gros et demy-gros, partie de troys mil mars qui restent à ouvrer
en lad. Monnoie en quoy feu Jehan Ferre, dernier exerceant icelle notred.
Monnoie estoit tenu faire dedans le temps et terme d'un an, surquoy nous aurions
bien voullu avoir votre advis, lequel depuys nous auriez envoié. Savoir
faisons que nous, inclinans à la supplication et requeste dud. Maillard,
à icelluy, suyvant votred. advis cy-attaché soubz notre contreseel,
avons, de notre certaine science, plaine puissance et auctoricté royal,
permys et octroié, permectons et octroions par ces présentes
qu'il puisse et luy loise achepter et faire achepter de noz dessusd. subjectz,
marchans, changeurs, mariniers et compaignons de mer et autres personnes tout
l'argent, soit en masse, cendrée ou lingotz, qui sera porté
pour cest effect en icelle notre Monnoie aud. Rennes, en donnant ausd. marchans,
changeurs et autres hantans et fréquentans lad. Monnoie de Rennes quatorze
livres dix solz tournois du marc d'argent-le-roy, et dud. argent faire ouvrer,
forger, baptre et monnoier des testons et demyz-testons à noz coing
et armes, des poix, loy et aux remèdes contenuz en noz ordonnances,
au pris et valleur chacun teston de unze solz tournoys pièce et le
demy à l'équipolent, jusques au nombre et quantité de
mil mars d'iceulx dedans ung an prochain venant à compter du jour de
la première délivrance que led. exposant fera en notred. Monnoie
dud. ouvraige, en nous payant toutesfoys par icelluy exposant le droict de
seigneuriage avecq les foiblaiges et escharcetez de loy qui se trouveront
par vous en faisant le jugement dud. ouvraige, et là où il n'auroit
entièrement ouvré et monnoié lad. quantité de
mil marcs d'iceulx testons et demys-testons dedans led. temps, néantmoings
nous payera le droict de seigneuriage de ce qui restera à forger et
sans diminucion du faictfort et charge que led. exposant est tenu faire pour
la vériffication par vous faicte de noz lettres de bail à luy
faict de la maistrise d'icelle Monnoie. Si voullons, vous mandons et commectons
par ces présentes que de noz présens octroy et permission, ensemble
de tout le contenu cy-dessus, vous faictes seuffrez et laissez, aux charges
et condictions dessusd., led. exposant joir et user plainement et paisiblement
durant led. temps, cessans et faisant cesser tous troubles et empeschemens
au contraire, car ainsi nous plaist-il estre faict, nonobstant quelzconques
ordonnances, déclarations, mandemens ou deffenses sur ce faictes à
ce contraires ausquelles, quant ad ce et sans préjudice d'icelles en
autres choses, avons, pour ceste foys seullement desrogé et desrogeons
de noz spécial grâce, plaine puissance et auctorité dessusd.
par cesd. présentes. Donné à Fontainebleau le cinquième
jour de juillet l'an de grâce mil cinq cens quarante-six et de notre
règne le trente-deuxième. Par le roy, à votre relation,
Duthier.
[scellé sur simple queue de cire jaune]
Voir au
2 juillet 1546 : Supplique de Nicolas Maillard, maître particulier de la Monnaie
de Rennes, au roi, pour obtenir la permission de continuer la fabrication
en la Monnaie de Rennes des testons et des demi-testons commencée par Jean
Ferre, décédé (s.d.). Renvoi aux généraux des Monnaies pour avis (26 juin
1546). Autorisation des généraux des Monnaies pour "la quantité de ce qu'il
reste à ouvrer des troys mil marcz de gros et demys-gros testons mentionnez
en la permission faicte par led. sieur à feu Jehan Ferre" (2 juillet 1546).
Monnaie
de Paris : ms F°232, f° 50r°-51r°